٢٨‏/٠٥‏/٢٠٠٧

مـصــر-امـريــكا...الــدول لــبـعـضـيــــهـــا

تعليقا على تعدد لقاءات اعضاء من الكونجرس الامريكى الزائرين لمصر مع اعضاء فى جماعة الاخوان المسلمين المحظورة اوضح المتحدث باسم رئاسة الجمهورية السفير سليمان عواد ان موقف الولايات المتحدة هو انها لاتقيم علاقات مع اي جماعة محظورة لا فى مصر ولا فى غيرها من الدول

اشار الى ان الاتصال الامريكى مع نواب مستقلين فى البرلمان المصري بصرف النظر عن انتماءاتهم انما يتم فى اطار كونهم اعضاء فى البرلمان....الخ الخبر منشور ف الصفحة الاولى بالجمهورية28/5



باقى الخبر بيقول ان المتحدث شايف ان الموقف ده يتناقض مع موقف الولايات المتحدة من حركة حماس اللى رافضة التعامل معاها باعتبارها حركة مسلحة لكنها ف الوقت نفسه ممثلة فى مقعد رئاسة الوزراء الفلسطينية...سيادة السفير بيقول برضه ان امريكا تعمل اللى هى عايزاه واحنا برضه نعمل اللى احنا عايزينه حماية للامن القومى المصرى وتشجيع مبادئ المواطنة وعدم خلط السياسة بالدين وان اللى يفتكر ان الامن القومى المصري اقل شأنا_واخد بالك من اقل شأنا دى_من حرص دول تانية من بينها الولايات المتحدة على امنها القومى انما يخطئ كثيرا_وحط تلاتة واربعين خط تحت انما يخطئ كثيرا دى روخرة


وده شئ زى الفل بصراحة باعتبارنا مش اقل من امريكا وحنعمل اللى احنا عايزينه راسنا براسها...انما الشئ الجديد ف مسألة العلاقات الثنائية بين البلدين واللي فرحنى بصراحة وحسسنى ان الدنيا لسة بخير والدول لبعضيها انك لما تقرا الخبر بتمعن شوية حتلاقى ان المتحدث باسم رئاسة الجمهورية اللى هو المفروض انه بيتكلم بلسان مصر ساب الليلة كلها وهاتك يا كلام بلسان امريكا..اشي موقفها واشي اتصالاتها واشي حركاتها


يعنى لو قلنا ان الفقرة الاولى من الخبر ممكن يكون استرجاع للموقف المريكى واشارة له عشان اللى مش واخد باله يقدر يفهم الفولة حتلاقى ان الفقرة التانية ف وشك عدل وانت داخل ع الخبر لاهى توضيح ولا استرجاع ولا نيلة انما دى تبرير ومش تبرير وبس لا دى كمان كأن الحاجة امريكا بجلالة قدرها هى اللى بتتكلم...بلاش امريكا نقول الست كوندى بلاش دى كمان ..طب على النعمة بوش بالتهتهة وحالة العته المغولى والزهايمر والهبل اللغوى اللى عنده مايعرفش يقول الكلمتين اللى احنا المصريين اهما وكدة قلناهم بداله..ده الراجل حتى ماكلفش خطره ونفى ولا كدب ولا اتحمق وقال احنا مانحبش القاهرة تتكلم بلسان واشنطن وكأن الكلام جاى على هواه بقى


بقية الخبر مش حتفهم منه حاجة...اللى بيتقال ف جملة يتقال عكسه ف الجملة اللى بعدها باعتبار ده ملخص للعلاقات الثنائية بين البلدين ف اعلى معدلاتها الصحية ونموذج للعلاقات المصرية الخارجية عموما حاليا ولسة لما عمك ساركوزى يوطى يحب على ايدين ام الدنيا الست امريكا عروس المحيط الاطلنطى ياما حنشوف


بس اللى يطمنك بقى ان الرياسة عندنا فتكة ومدقدقة وواخدة بالها كويس قوى م الفولة ومابيضحكش عليها وفهمت بالحداقة كدة والنباهة والفهلوة ان امريكا بتفرق بين الاخوان "كجماعة محظورة" ونوابها بالبرلمان...اللهم صلى ع النبى شفتوا الفتوح..يعنى لما الامريكان ياخدوا راند فو مع الاخوان المحصورة بيبقى قصدهم شريف عشان يطمنوا ع البرلمان بتاعنا برضه الامر مايسلمش تكون لازماه حاجة كدة ولاكدة وواشنطن طول عمرها رقبتها سدادة..انما لما تقابل الاخوان المحصورة ف الضلمة ف الملاحات عشان يفيشوا الهوامش سوا ساعتها يبقى يحلها حلال وهو احنا حنسبق الاحداث ليه بس..وبرضه مايصحش نشك ف الاخوان باعتبارهم ناس بتوع ربنا ومش ممكن يأذونا لان الاذية مش طبعهم والامريكان مايتخيروش عنهم كدة

٢٧‏/٠٥‏/٢٠٠٧

شــــــــئ فـــى" صــــــــــــــــدرى"



د.عزت عطية رئيس قسم الحديث بكلية أصول الدين بجامعة الأزهر فجر مفاجأة حيث أباح للمرأة العاملة أن تقوم بإرضاع زميلها في العمل منعاً للخلوة المحرمة، إذا كان وجودهما في غرفة مغلقة لا يفتح بابها إلا بواسط أحدهما.واكد عطية أن إرضاع الكبير يكون خمس رضعات وهو يبيح الخلوة ولا يحرم الزواج، وان المرأة في العمل يمكنها أن تخلع الحجاب أو تكشف شعرها أمام من أرضعته، مطالباً توثيق هذا الإرضاع كتابة ورسميًا ويكتب في العقد أن فلانة أرضعت فلانًا

عضو مجلس الشعب عن كتلة الاخوان المسلمين صبري خلف الله اكد من جانبه إن نحو 50 نائبا في البرلمان تدارسوا هذا الموضوع مساء الأربعاء وأعربوا عن قلقهم من انتشار هذه الفتوى اعلاميا، واقترح بعضهم تقديم طلبات احاطة، لكنهم اتفقوا على ارجاء ذلك، واعطاء فرصة للأزهر والاعلام لوقف الخوض في هذا الموضوع الذي أثار حالة من اللغط الشديد في الشارع المصري خصوصا في أماكن العمل التي تضم موظفين وموظفات، وعندها قد يمتنعون عن طلبات الاحاطة منعا لحدوث زوبعة برلمانية قد تساهم في تضخيم المسألة وتضر بالاسلام




لحد هنا والكلام زى الفل...بلد مافيهاش رجالة و اللى فيها لسة بيرضعوا....ماشي..بتحصل ف احسن الديموقراطيات...الاخوة بتوع الازهر لسعوا وجابوا اخرها....اما الجماعة بتوع الاخوان المسلمين بقى فهما طبعا مايقدروش يحطوا منطق...من ناحية الراجل بيتكلم شرعى ومن ناحية تانية ده راجل زيهم بتاع ربنا ومايصحش يكحوا معاه ليرقعهم فتوى تسخطهم قرود...اذا كان سخطهم رضع مش حايقدر يسخطهم قرود!ومن ناحية تانية بقى الراجل ماكفرش...يعنى لما فاروق حسنى يقول الست تبقى مزة من غير حجاب ده كفر صريح انما لما الشيخ عزت عطية يقول الست تقلع ملط عشان معاد الرضعة فدى نقرة ودى نقرة تانية خالص


ماعلينا كل ده بيحصل والله ف احسن الديموقراطيات والبلد دى احسن من غيرها على الاقل هنا تضمن نومة واكلة ورضعة كمان..انما المسألة بجد كدة تبقى سداح مداح..الحكاية ماتنفعش تتساب كدة لكل من هب ودب...دى لازم لها تقنين وضع وعشان كدة وباعتبارى قال يعنى ست وكدة وعندى الاليات المفروض تواجدها ف الاوضاع اللى زى دى زى اى ست يعنى وباعتبارى باشتغل ف "مكان حساس" ولى زمايل شحوط ياما واصلا كل اصحابى شباب من ايام الجامعة ولان الاخ عطية لا فض فوه مش اول واحد يتكلم ف المواضيع دى حيث سبقه فقيه جهبذ تانى شايف ان ركوب الست للتاكسي خلوة شرعية مع السواق وبالتالى تستوجب الرضاعة بقى فانا باقترح



ان كل الموظفات يبطلوا تنظيم النسل ويفضلوا يخلفوا زى الارانب تحسبا لاى رضاع مفاجئ لاى زميل يعنى...واللى ماتجوزتش تاخد اجازة رضاعة بدون مرتب لحد ماتشوف لها حل ف الليلة السودا دى



بالنسبة للخلوة مع سواق التاكسى...ف ممكن نطلع تشريع يلزمه يركن على جنب ف حتة ضلمة الاول ويرضع خمس ست مرات قبل مايتوكل بالعربية...ونضيف الرضعة ع البنديرة




نعمل وزارة للرضاعة وتتولاها وزيرة مفوضة ويبقى منصبها وزيرة الدولة لشئون رضاعة الكبير وتلقب اختصارا بمرضعة قلاوون للتفرقة بينها وبين المرضعات العاديات اومرضعات الاطفال.. ونعمل حملات تفتيش بقى والست اللى تحمرق وترضع زمايلها ولا سواقين التاكس اقل من خمسة رضعات مشبعات تتجلد ف ميدان عبد المنعم رضاع...قصدى عبد المنعم رياض بعد مانغير اسمه تماشيا مع المرحلة..والراجل اللى مايعجبوش الصدر من حقه يتقدم بشكوى رسمية لمرضعة قلاوون على ان تقوم بتشكيل لجنة من خمس سيدات ماتقلش مقاسات براهاتهم عن 38دى تريومف لبحث المشكلة واذا ثبت ان الست غلطانة تاخد ست شهور حبس ف ابو زعبل ولا الحضرة يعنى مش ف القناطر مع النسوان عشان ترضع المساجين لحد مايتقطع نفسها وتعرف ان الله حق




البنات الصغيرين عليهم انهم يرضعوا المدرسين بتوعهم برضه عشان الخلوة ويبقى فى حاجة اسمها حصة رضاعة ف المدارس الحكومية يعلموا فيها البنات على يد متخصصين كيفية الرضاعة الطبيعية على اصولها مع التفرقة بين رضاعة الاطفال و رضاعة الشحط اللى ممكن يكون المدرس الخصوصى بتاعها




الزوج ف الحالة دى وفقا للشرع وقوانين المرأة وحقوق الانسان يبقى من المحرمات بالنسبة لزوجته...يعنى هى بالفعل بتنكشف عليه عادى و بتنام معاه كمان والكل عارف يبقى ايه لزمتها الرضاعة بقى ان شاء الله...احنا حنستعبط ونخلط الحابل بالنابل...قلنا الرضاعة لاباحة الخلوة وطالما الخلوة مباحة ف اصل الشرع بين الزوج و زوجته يبقى انتفى مبرر الرضاع بينهما بالعكس بقى ده يبقى انتهاك لحرمة الخلوة اللى بينهم وبالتالى يحل للزوج معاشرة زوجته على جميع الاوجه اللى اقرها الشرع على ان يحرم عليه الرضاع منها...ومن تتقدم بشكوى لمرضعة قلاوون بان زوجها حاول الرضاع منها يتم تحويله فورا لمحاكمة عسكرية ومن حق المجلس الاعلى لحقوق الانسان التضامن التام معها باعتباره بيتصدى لحالة استغلال واضح للمرأة ..الله هى حترضع جوة وبرة




بالنسبة للاطفال الرضع اللي يحق لهم الرضاعة بقى فحتلاقى ان العلم ماخلاش حاجة الا اما حلها و البيبى دلوقت معمول له بيبرون وبزازة يبقى لا مبرر شرعا لارضاعه اما قصة فصاله فى عامين" بقى دى يا حلو فيها جدل لان محدش قاللهم انهى سنتين بالظبط ..يعنى لما يبقى متوسط عمر الحلوف البنى ادم نقول 60 سنة يبقى نقى اى سنتين تفطمه "فيهم...ده انت كمان ممكن تفطمه ف سنتين مش متتاليتين يعنى تفطم الشهر ده اسبوع عارضة وكدة يعنى...وعموما الكبير يستثنى من الفطام لانه كبر ع المسألة دى خلاص ايه حنرجع نكلمه تانى فيها كدة من غير مناسبة ده حتى يبقى لعب عيال