٠٧‏/٠٥‏/٢٠٠٨

الــعـــلاوة الـطحيـنـيــــة..ومـقــالـــب الـحــرامـيـــــة



الكلام واضح ومفسر نفسه ومتاخد نقلا عن المصري اليوم ولو بصيت على الجرايد المحلي كلها حتلاقيها قايلة نفس الكلام وان كان بصيغ مختلفة كل حسب انتمائه مع او ضد او نص نص


ماعلينا اللى فارسنى وفاقع مرارتي ان الشعب بيتصرف وكأنه ياولداه اتفاجئ...ياليلة سودا دى عشرة تلاتين سنة ياخوانا...هو احنا لسة حنعرف السيستم النهاردة..الله يمسيه بالخير لينين الرملي قالها ييجي من عشرين سنة واكتر ف تخريفة من تخاريفه"اديهم علاوة خمسة اسكارتة يفرحوا بيها وخد منهم ضرايب عشرة اسكارتة...انا عايز حكومة تلعب بالبيض والحجر" واظن مفيش حكومة ف العالم لعبت بالبيض والحجر والحديد والاسمنت ودماغنا فوق البيعة قد الحكومة المصرية الراسخة فوق قلبنا من تلاتين سنة ولكنها تتنكر باسماء مختلفة..اشي حكومة زيد وعبيد ونظيف واكثر بياضا وهكذا...وهى هى نفس الحكومة والله غيرشي بس هى موضة اسماء.

يعنى قعدوا يذلونا وينشفوا ريقنا ويفرجوا علينا العالم ييجي سنة واكترعشان خاطر العلاوة اللي قعدوا يعملولنا بيها البحر طحينة لما بقت علاوة طحينية وقوموا الدنيا وماقعدوهاش عشان يحلوا الكيس ويدونا بقشيش ويرفعوها لخمستاشر ف المية بس...قوم اذ فأجتن رفعوها لتلاتين ف المية...الضعف حتة واحدة..طب بذمتكو محدش اتخض...محدش قلق...مفيش فار واحد صايع برم لافف ديله لعب ف عب واحد...واحد بس من التمانية وسبعين مليون دول

اخص..اخص...ده مالهوش غير معنى واحد اننا لسة ماخدناش على كدة...اى والله واننا حنفضل ننطس مقالب الحرامية دى لحد مانموت احنا او يموتوا هما او يموت الحمار على رأى جحا

انا سخصيا اول ماسمعت خبر العلاوة ضغطي على مش م الفرحة انما م الصدمة مقدما..وقد كان ..لسة العلاوة ماتصرفتش ياكفرة والبلد ولعت...اشي بنزين واشي زيت واشي هباب ازرق وعشان ماتتخضوش وتعملوا فيها ماكنتوش هنا ساعة ما حصل اللي حصل...فانا باقول من دلوقت مصاريف المدارس حتولع روخرة...ولولا الملامة كانوا رفعوها م النهاردة بس كل سنة وانتو طيبين ع الموسم الدراسي الجديد بقي وعليكو خير عشان اللي عنده عيلين ف المدارس يشوف مين فيهم حيكمل ومين حيقعد عشان مصاريف اخوه

لحد فترة قريبة ماكنتش فاهمة قوى اللي بيحصل فينا ده بيحصل ليه...بس لو بصيتوا ع الفقرة الاولى م الخبر عاليه اللي بتقول ان الزيادات اقترحتها لجنة الخطة والموازنة، برئاسة المهندس أحمد عز، أمين التنظيم بالحزب الوطني..تفهم الفولة..بيقوللك امين التنظيم يا مولانا...يعنى الحكاية فيها تنظيم غرضه قلب نظام الحكم فوق دماغ اللي خلفونا...مش هما لما بيقفشوا بتوع اى تنظيم يقوللك اصله تنظيم لقلب نظام الحكم...اى والله اهو التنظيم اللي ف الحزب الوطنى ده راخر غرضه قلب نظام الحكم بس فوق ام راس الشعب

ماعلينا بقي نيجي للنكتة اللي ف الموضوع ودى اللي خليتنى اخلع القبعة والجزمة كمان..يعنى من فوق لتحت..احتراما وتقديرا واجلالا للسيد نظيف اللي بقي عامل زى ريري كدة مشبعنا ومغذينا ومكبرنا ومقوينا...المهم الراجل مارضيش يرفع سعر البنزين اوكتان تمانين...شفتوا حنية اكتر من كدة...شفتوا مسخرة انقح من كدة...الراجل بيبعت رسالة بالشيفرة للبهايم اللي هما احنا اللي ناكرين خيره ونفسنا نشوف زمن غيره بيقوللنا من تحت لتحت كدة وف الدرا عشان ماحدش يرقعنا عين..انتو لسة عندكو بنزين تمانين ياغجر بس مدكنينه وانا فاهم الحركات دى كويس وحاطلع ابن اصل معاكو واحسن م اللي خلفوكو ومش حاحصل عليه جباية...قال يعنى

طب والنبي انتو حكومة عسل...اى والله..وحكاية انكو تستوردوا شعب احسن مننا دى معادتش تليق بمقامكو..لا بقي انا باقول انتو تبيعونا روبابيكيا واهه اللي ييجي منا احسن من عينا وبلاها شعب اصلا...انتو تقعدوا كدة لوحدكوا تتشمسوا من غيرنا ف جولف بورتو مارينا وستيللا العين الحمرا على رواقة..ولا تجيبوا حد يتحكم ولا نيلة...حكومة كدة بربطة المعلم قرديحي من غير شعب ويعنى لو نفسكو هفتكوا قوى على حكاية الحكم دى بحكم ان اللي فيه داء بعيد عنك يعنى..ابقوا استعيذوا بالله من الشعب الرجيم

هناك ٣ تعليقات:

ابو احمد يقول...

دا الشغل الامريكانى بتاع لجنه السياسات
وهذا اول الغيث كما صرح المهندس رشيد
تحياتى

داهية فرفر يقول...

العزيز ابو احمد

والله دي لاهي بشاير لجنة السياسات ولا هى اول غيث رشيد..دى نفس اللعبة اللى بتتلعب معانا من ايام عاطف صدقي غيرشي بس اللي خض الناس المرة دى الفرق الكبير في قيمة العلاوة الطحينية وقيمة ارتفاع الاسعار التى تناسبت طرديا مع حكاية التلاتين ف المية وده باختصار فارق معدلات التضخم السابقة والحالية...الحكاية وسعت قوي ومحدش عارف يلمها...اى والله

^ H@fSS@^ يقول...

انا مش عارفة انتي مدونتك كانت غايبة عني ازاي
انت تحفة ايجابية لا يمكن السكوت عنها
بصي
مش عارفة بجد اقلك ايه
كلامك في الصميم و باسلوب ساخر طبيعي جدا
مش بتفتعلي حاجة يعني
و ده اللي انا حاساه
انتي خرجتيني من حالة ماساوية بنت ناس وحشين جدا جدا جدا
انت مؤكد داخلة الجنة
اه والله العظيم ودي شهادة مني بكده
و ممكن ادمغهالك و اجيب توقيع اتنين موظفين من ذوي الدخل المعدوم
تحياتي