ده بقي كلام موثق ف جرنان روزاليوسف ف ساعته وتاريخه...يعنى ماجبتش حاجة من عندى
بجد ياخوفي لا يقلعونا العباية يا بدرااااان...معناة الخبر اننا لحد دلوقت مستورين ف عباية الدول النامية...المشكلة بقي ف سنة 2030 اللي مايعلم بيها الا ربنا دى..ساعتها حيقلعونا العباية..بس تفتكروا حيلبسونا ايه..ماهه مش ممكن يلبسونا مكانها طرطور مثلن..اصلنا لابسينه من زمااااااان بس مش عايزين نتكلم عشان النق والقر والحسد...وبرضه مش معقول حيلبسونا العمة..روخرة فضلنا لابسينها كتيييير لحد مابقت بايخة وموضة قديمة وادونا مكانها الطرطور اياه ده...كما انه_الله يا عينى ياودنى يامناخيري على كما انه دي_ كما انه مايصحش نلبس السلطانية حيث اننا لازلنا جمهورية ولا ممكن ابدن نبقي جماهير ف الجمهورية ولابسين سلطانيات لزوم السلطنة...يكونش حيلبسونا ف الحيط...بس دى مش اول مرة وطول عمرنا لابسين ف الحيط على ايديهم يعنى مهياش مناسبة انهم يعلنوا انه سنة الفين وابصر كام حيلبسونا ف الحيط تاااااانى .. اصله مش خبر يعنى
بيني وبينكم الفار الاجرب اياه لعب ف عبي وانا عبي مش ناقص ومعبي من ام الحكومة السودا دى...المهم قعدت اقلبها اشي يمين واشي شمال..قام هدانى تفكيري مهدود الدخل لان الحكومة سنة2030 حتقلعنا العباية النامية وتمشينا ملط...سلبوتة..من غير هدوووم واذ ربما يعملوها ساعتها ف الشتا ويسيبونا ف الطل كدة البرد يهري جتتنا
نهايته الريس نظيف شايف ان امكاناتنا تؤهلنا لان نكون ف مصاف الدول المتقدمة..وماقالش بقي دلوقت ولا سنة 30...يعنى لو امكاناتنا كدة دلوقت يبقي ايه اللي مش مخلينا ف المصاف اللي بيقول عليها دي..ولو الكلام ده ساعتها يبقي سيادته عرف منين..بيشم على ضهر ايده مثلن...دى منكن نتقبلها...بيخمن..دى مقدور عليها..ولا بيقول باعتبار انه قاعد على قلبنا لساعتها يعنى فعارف بقي العفريت مخبي عياله فين...اهه ده اللي انا عاملة حسابه بقي
وبعدين بيقوللك تدعيم الصناعة وتطوير التعليم وتنمية العنصر البشري هما دول التلات اسباب اللي...اربع اسباب حيخلونا نحقق الرؤية المستقبلية...ماشي...يعنى الكلام ده موجود ولا لسة حنبعت نشتريه...المصيبة ان تفاصيل الخبر مش باين لها راس من رجلين..يعنى مثلن خد عندك...
بيقوللك يامولانا ان نظيف اكد على اهمية ان تتضمن الرؤية المستقبلية نقل مصر من اطار الدول النامية الي اطار الدول المتقدمة...يعنى لاهو الرؤية المستقبلية من ساعتها ماتتضمنتش! ياليلة طين...يا سنة سوخة يا سنة سوخة..امال كانت مستقبلية ازاى.. وبعدين بيقوللك امكانات مصر ابصر معرفش ايه تؤهلها لان تكون ف مصاف الدول المتقدمة اذا احسن استغلال هذه الموارد ...الخ..يا قرن اسود من قرن الخروب..امال الامكانات دى كانت بتستغل ازاى...وهو حسن استغلال الموارد راخر فيه اذا!...يعنى يا اما تستغل يا اما ماتستغلش وانت وبختك يامواطن!...وبعد ده كله عايز يحطنا ف مصاف الدول المتقدمة...بقي بالذمة المصاف دى حتقبل اننا نتحط فيها ولا حتى نهوب نواحيها بعد زليون سنة بالشكل ده...ثم هل انتو سألتوا المصاف ايه موقفها من دولة ريس وزرائها بيقوللك الموارد اذا احسن استغلالها!علمن بانى اموت واعرف الست مصاف دى فين وبتهبب ايه
مش باقوللكم يظهر انهم حياخدوا العباية اللي ساترانا ويبيعوها ويجيبوا بتمنها شماسي بحر ومايوهات لزوم القعدة ف بورتو مارينا سنة2030..ونقعد احنا ملط نستنى توك توك الفرج!
سايق عليكو النبي ماحدش له دعوة بعباءة الدول النامية..ده هي دى اللي حيلتنا..النبي على قلبكو تدعوا معايا ربنا يحنن قلب نظيف والاربعين وزير بتوعه علينا ويكف ايديهم عن العباية...طب شطارتهم بس لما تيجي 2030 نلاقي العباية النامية موجودة اصلن مش نلاقي الدول النامية هي اللي خدت عبايتها وراحت
