الحكاية مش محتاجة فلحسة ولا حاجة ستات مصر بعد مايرضعوا رجالتها مجانا لوجه الله عشان الخلوة حيروحوا يخدموا ف البيوت ف السعودية واذا حصل خلوة برضه اهه حلها معروف
السيدة عيشة الله يحفظها بعيدا عن متناول الاطفال باعتبارها ست وحاسة بالنسوان اللى زيها وعارفة قد ايه اكل العيش مر خصوصا بعد مابقت وزيرة فقررت تبعت ستات مصر كلهم بربطة المعلم يخدموا ف البيوت السعودية العامرة بمالذ وطاب ولكم ف الاميرة هند الفاسي اسوة حسنة يا اولى الالباب واهى ست زيها برضه وارست مبدأ مهم ف التعامل مع المصريين عموما ف واقعة كلاب الامير الا وهو كلب عض كلب...خدمناها جوة وخدنا اللى فيه القسمة فمابالك لما نروح لحد عندها نخدمها ونخدم اللى خلفوها واللى بيخدموها كمان
المهم الست الوزيرة قلبت وزارة القوى العاملة الى مكتب مخدماتى عمومى لصاحبته ومديرته الحاجة عيشة وكيلة كوبانية الحكومة المصرية لتوريد الخدامات وخلافه..راحت اتفقت مع اتحاد الغرف السعودية دكاكينى من غير وجود وزير سعودى اقله تبقى قعدت مع حد من مقامها...ويقال ان الوزير رفض يقعد معاها من غير محرم وعشان كدة الست خلصت الليلة ف الدخنسة لوحدها كدة ف الغرف التجارية ولا من شاف ولا من درى...امال يعنى تروح لهم لحد عندهم وترجع ايد ورا وايد قدام من غير ما تعمل حاجة كدة واما الكوبانية تسألها تقوللهم اصلى رحت لقيت الوزير ف الحمام
اللي يضايق يا اخى بقى اجرة الخدامة المصرية اللي الست راحت اتفقت عليها,800 ريال ياحاجة!!؟؟؟؟ يا نهار اسود ومهبب واكحل من قرن الخروب...دى الخدامة من دول لو حصل لها حاجة كدة ولا كدة وحبت ترجع مش حتلقى تمن التذكرة يا ستنا عيشة....سيبك م اللى بياخدوه الهنديات والفليبينيات قول دول برضه بنات اصول لهم حكومة تجيب حقهم والحكاية بالنسبة لهم مش سداح مداح كدة بالاضافة لنقطة مهمة ان معندهمش فتوى رضاعة...انما المصرية حتعمل اللى دول بيعملوه واكتر زائد الرضاعة..طب يا حاجة اختشى وحطى ف عينك حصوة ملح وضيفى تمن اللبن
البروتوكول اللى وقعته الحاجة عيشة زى البلوة فوق نافوخنا قال بيشترط ان الخدامة تبقى مؤهل عالى!!! طب اشمعنى ده بقى اللى عايزينه عالى ما كله واطى واطى واطى اهه جت ع المؤهل ويبقى عالى...يا زين ماخلفتى وربيتى يا زينب عالمة وخدامة
شايفااااااااااك ياللى بتقرا ومشمئنط ورافع حاجب ومنزل اخوه وبتقول لى من تحت الضرس باستنكار بلوتوثى جهنمى بالغ قصدك ايه يا داهية هى الخدمة ف البيوت عيب؟؟؟ اقوم اقول له انا باستحمار وحدوى تفاعلي ضعيف ان ده مش قصدى...الخدمة ف البيوت وكنس الشوارع وتسليك البلاعات كمان كله شغل واحسن م العوالة ومد الايد او مد حاجات تانية كمان انما العيب هو السخرة وتجارة العبيد وبيع البنى ادمين اللى بيحصل دلوقت والاسم اننا "بنخلق فرصة عمل" "والحقيقة اننا "بنخنق اخر امل
لا واللي يضحك بقى ان عيشة عملتها وجريت...راحت تصيف ف مؤتمر ف جينيف "اصلها طراوة انما السعودية حر وخنقة بعيد عنك و"الخدمة فيها مش قد كدة
هناك ٣ تعليقات:
اللي هيقرا الموضوع ده مستحيل يمشمئنط أو يرفع حاجب وينزل اخوه لأن الموضوع مؤلم جداًجداً من طقطق لسلاموا عليكو (ميه وعشرين الف - هند الفاسي - الكلاب - نص أجر الفلبينية رغم فوائد لبن الأم - خدامة بمؤهل عالي )
اشكرك جداً على الموضوع وهانشوف مجلس الشعب السعيد تبعنا هيهز طوله ويعمل ايه
ملحوظة : العربيات دي للبيع ؟؟
عزيزى الحس المحفوظ فى ظروف بيئية مناسبة
اولا: بالنسبة لمجلس الشعب فقدامه حل واحد من اتنين...يا يمشي البروتوكول لانه مايصحش السيدة عيشة ترجع ف كلامها ودى كبيرة من الكبائر خاصة بعد ما فتحت النار على شركات العمالة المصرية باعتبارهم خونة..خونة..خونة..خونة ومحدش حاسس بالتضحيات اللى عملتها وقعدتها لوحدها قافلين عليها الغرف التجارية ف السعودية لحد ماتسلم ورق اجابة البروتوكول ولا كانها امتحانات السنوية الغامقة وده السادة الاعضاء واخدينه ودارسينه كويس باعتباره من المقرر بتاع المجلس يا اما الحل التانى بقى وده زى مانت عارف وسيد العارفين ملغى ومش جاى ف الامتحان يبقى الاعضاء يذاكروه ليه اصلا
...وشكرا على اتصالكم ونتمنى لكم اقامة سعيدة
اما بالنسبة للعربيات فهى للبيع بالمزاد العلنى وتطلب كراسة الشروط والمواصفات من اى مكتبة
ملحوظة لا تدفع اكثر لما ممكن تدفع اقل
فعلا كما قال حسام الموضوع لا يدعو للدهشة فهى فضيلة راحت مع هنادى فى الوبا او فى 67 فلا شىء يستعجب فى بر المحروسة و بصراحة كنت ناوى أعلق بتهريج بس مش جايبة معايا خالص... فالموضوع كله يدخل ضمن مواضيع كثيرة يعنى بلغة الفرنجة pakage
فالتفريط فى الكرامة قديم ولا يجدى معه "الترقيع" و على رأى من قال:
والعروسة قال ايه مكسوفة
وداخلة الكوشة هدومها منكوشة
والدم مغرق الملاية
من سنة 48
وابوها اتعشى ونام
إرسال تعليق