الــعـــلاوة الـطحيـنـيــــة..ومـقــالـــب الـحــرامـيـــــة

الكلام واضح ومفسر نفسه ومتاخد نقلا عن المصري اليوم ولو بصيت على الجرايد المحلي كلها حتلاقيها قايلة نفس الكلام وان كان بصيغ مختلفة كل حسب انتمائه مع او ضد او نص نص


ماعلينا اللى فارسنى وفاقع مرارتي ان الشعب بيتصرف وكأنه ياولداه اتفاجئ...ياليلة سودا دى عشرة تلاتين سنة ياخوانا...هو احنا لسة حنعرف السيستم النهاردة..الله يمسيه بالخير لينين الرملي قالها ييجي من عشرين سنة واكتر ف تخريفة من تخاريفه"اديهم علاوة خمسة اسكارتة يفرحوا بيها وخد منهم ضرايب عشرة اسكارتة...انا عايز حكومة تلعب بالبيض والحجر" واظن مفيش حكومة ف العالم لعبت بالبيض والحجر والحديد والاسمنت ودماغنا فوق البيعة قد الحكومة المصرية الراسخة فوق قلبنا من تلاتين سنة ولكنها تتنكر باسماء مختلفة..اشي حكومة زيد وعبيد ونظيف واكثر بياضا وهكذا...وهى هى نفس الحكومة والله غيرشي بس هى موضة اسماء.

يعنى قعدوا يذلونا وينشفوا ريقنا ويفرجوا علينا العالم ييجي سنة واكترعشان خاطر العلاوة اللي قعدوا يعملولنا بيها البحر طحينة لما بقت علاوة طحينية وقوموا الدنيا وماقعدوهاش عشان يحلوا الكيس ويدونا بقشيش ويرفعوها لخمستاشر ف المية بس...قوم اذ فأجتن رفعوها لتلاتين ف المية...الضعف حتة واحدة..طب بذمتكو محدش اتخض...محدش قلق...مفيش فار واحد صايع برم لافف ديله لعب ف عب واحد...واحد بس من التمانية وسبعين مليون دول

اخص..اخص...ده مالهوش غير معنى واحد اننا لسة ماخدناش على كدة...اى والله واننا حنفضل ننطس مقالب الحرامية دى لحد مانموت احنا او يموتوا هما او يموت الحمار على رأى جحا

انا سخصيا اول ماسمعت خبر العلاوة ضغطي على مش م الفرحة انما م الصدمة مقدما..وقد كان ..لسة العلاوة ماتصرفتش ياكفرة والبلد ولعت...اشي بنزين واشي زيت واشي هباب ازرق وعشان ماتتخضوش وتعملوا فيها ماكنتوش هنا ساعة ما حصل اللي حصل...فانا باقول من دلوقت مصاريف المدارس حتولع روخرة...ولولا الملامة كانوا رفعوها م النهاردة بس كل سنة وانتو طيبين ع الموسم الدراسي الجديد بقي وعليكو خير عشان اللي عنده عيلين ف المدارس يشوف مين فيهم حيكمل ومين حيقعد عشان مصاريف اخوه

لحد فترة قريبة ماكنتش فاهمة قوى اللي بيحصل فينا ده بيحصل ليه...بس لو بصيتوا ع الفقرة الاولى م الخبر عاليه اللي بتقول ان الزيادات اقترحتها لجنة الخطة والموازنة، برئاسة المهندس أحمد عز، أمين التنظيم بالحزب الوطني..تفهم الفولة..بيقوللك امين التنظيم يا مولانا...يعنى الحكاية فيها تنظيم غرضه قلب نظام الحكم فوق دماغ اللي خلفونا...مش هما لما بيقفشوا بتوع اى تنظيم يقوللك اصله تنظيم لقلب نظام الحكم...اى والله اهو التنظيم اللي ف الحزب الوطنى ده راخر غرضه قلب نظام الحكم بس فوق ام راس الشعب

ماعلينا بقي نيجي للنكتة اللي ف الموضوع ودى اللي خليتنى اخلع القبعة والجزمة كمان..يعنى من فوق لتحت..احتراما وتقديرا واجلالا للسيد نظيف اللي بقي عامل زى ريري كدة مشبعنا ومغذينا ومكبرنا ومقوينا...المهم الراجل مارضيش يرفع سعر البنزين اوكتان تمانين...شفتوا حنية اكتر من كدة...شفتوا مسخرة انقح من كدة...الراجل بيبعت رسالة بالشيفرة للبهايم اللي هما احنا اللي ناكرين خيره ونفسنا نشوف زمن غيره بيقوللنا من تحت لتحت كدة وف الدرا عشان ماحدش يرقعنا عين..انتو لسة عندكو بنزين تمانين ياغجر بس مدكنينه وانا فاهم الحركات دى كويس وحاطلع ابن اصل معاكو واحسن م اللي خلفوكو ومش حاحصل عليه جباية...قال يعنى

طب والنبي انتو حكومة عسل...اى والله..وحكاية انكو تستوردوا شعب احسن مننا دى معادتش تليق بمقامكو..لا بقي انا باقول انتو تبيعونا روبابيكيا واهه اللي ييجي منا احسن من عينا وبلاها شعب اصلا...انتو تقعدوا كدة لوحدكوا تتشمسوا من غيرنا ف جولف بورتو مارينا وستيللا العين الحمرا على رواقة..ولا تجيبوا حد يتحكم ولا نيلة...حكومة كدة بربطة المعلم قرديحي من غير شعب ويعنى لو نفسكو هفتكوا قوى على حكاية الحكم دى بحكم ان اللي فيه داء بعيد عنك يعنى..ابقوا استعيذوا بالله من الشعب الرجيم

إمـاطــة "الـنــقـــاب" عـن الـمــجـــتــــمـــــع صــــدقــــــة!

للعلم لقد كان لهذه الكاتبة مجموعة من المقالات التى تتناول قضية الحجاب والنقاب اخرها ذلك المنشور امامكم الذى اتمنى ان يكون له من المنطقية ما يجبر من لا يتفقون مع وجهة النظر المطروحة به على التسليم ولو نظريا بحتمية منع ارتداء النقاب لما له من مدلولات تتنافى وابسط قواعد اعمال العقل التى نادى بها الدين

وفى انتظار ردودكم

رجـعــت يــا مـحــلـــى نـورهــا!

باختصار مجفف غير مخل سيبكم من كنتى فين وانا فين جيتنى منين...لأن حالات الاختفاء والتخفى والخفية تعد فى حياتى قاعدة وماعداها قاعدة برضه حيث انه من المعروف عنى انى معنديش استثناءات

مـــــــــــــــــا عــــلــــيــــــنـــــــــــــــــــا

رجعت لكم زى القضا بطئ ومتلكئ ومثقل بالبيروقراطية واقصائه عن الاشراف على لجان الانتخابات او اى تشبيه شاعرى اخر...المهم احد الحاجات اللى رجعتنى كانت احراز كاس افريقيا للمرة السادسة...شئ ممتع خاصة اننا لعبنا المرة دى بجد..حاجة حلوة
بس...
بما انى فقرية وبوز نحس بقى فلابد من بس دى...بس فرحة الناس الهيستيرية المتشنجة دى حاجة تقلق برضه...متهيألى انهم لوكانوا رجعوا م الدور الستاشر ولا من التمانيات الشعب كان حيخرج يستناهم بالقنابل والسلاح الابيض..كانوا حيتقطعوا...مش عشان الشعب مجانين كورة والعياذو بالله ولا عشان البطولة تهمهم لدرجة الاغلاق_اى ان الشعب يبقى مش ف وعييه ساعة البطولة_انما عشان الناس عندها طاقة ومحتاجة تفرغها...شحنة هاااااااااااااااااااائلة من المشاعر المتناقضة اللى لابد انها تخرج باى كيفية....وده مؤشر مقلق فى حياة الشعوب
مصر عاملة زى الست اللي جوزها سايبها وراح الخليج وانقطعت اخباره وعيالها ماتعرفش عنهم حاجة وجيرانها عمالين يرموا على غسيلها مية مش ولابد على رأى السادات الله يرحمه والدنيا ملطشة معاها من كل ناحية قوم لو دخلت رجلها شوكة ولا حد جاب لها شبشب جديد كله عندها سيان فتقع من طولها مسورقة...رد فعل هيستيرى مبالغ فيه...يخض...لايتناسب مع الموقف لكنه بالتأكيد يناسب مخزونها الاستراتيجى الهائل من الضغوط
لو فيه حد يهمه امر الست دى لزمن حتمن ولابد من كل بد يسأل نفسه مالها...ويقلق ويحس ان امورها مش ماشية تمام
ولأنى زى مانتو عارفين وش فقر فانا بقى يهمنى الست دى وحاسة انها مش مظبوطة... حتى ف عز فرحتها البلد دى تعبانة
اقولو قولى هذا واستغفرو الله لى ولكم بس على الله يقبل

فـــى "وأد البــنـــات" انــا كــنـــت نـابـلــيـــون

الخبر منشور ف اول ايام شهر النكسة ف كل الصحف المصرية القويمة وان كنت كل ماجى اعلق احس بمرارة تكرار الهزيمة التى اراها ف عين كل مصري عاجز عن مواصلة الحياة ولو بادنى مقومات البقاء حيا

ممكن نتكلم للصبح ونقعد بقى نقول الراجل الواطى اللى معندهوش دين...اللى قتل بنته الغلبانة...وهاتك يا شتيمة للصبح

ممكن كمان نعمل فيها بتوع تحاليل وتحليلات وتحلل ونقول الجهل+الفقر+اى حاجة حيوصلنا للنتيجة دى

ممكن نقول انه فى اوروبا والدول المتقدمة _على رأى وحيد حامد_الفقرا هناك بياخدوا اعانة وان فيه مؤسسات رعاية تهتم بالاطفال اللى زى دول

ممكن تقول واقول ويقولوا ونقول حاجات كتيييييييير قوى واهه ف الاخر كلام وتعاطفك بس مش كفاية

انما الحقيقة المرة اللى احنا مش قادرين نواجه نفسنا بيها ان ف مصر دلوقت ناس بدأت تقتل عيالها خشية املاق زى ماربنا سبحانه وتعالى حذرنا

الحالة بقى لايمكن السكوت عليها....الشعب_بلاش الشعب كله عشان نظيف بيتخض_فئة م الشعب بتوأد عيالها خوفا عليهم من فقر اهاليهم

وكأن الحكومة بتقتلهم هنا وتعهد بدفنهم الى الحكومة السعودية الشقيقة...وتقبض النقطة شوية ريالات ماتكفيش حق الكفن

من موقعى هذا اعلن ان ادريس مش مختل عقليا...وانه مسؤل وواعى كويس للي عمله..وأد بنته عشان خايف عليها من فقره...من عجزه عن حمايتها ماديا ومعنويا...من يأسه من تحسن احواله تحت حكومة مش شايفة غير نفسها ومش لاقية حل بعد بيع البلد برخص التراب الا بيع اهله ونسوانه للخدمة مجانا عند اللى يسوى واللى مايسواش مقابل حق الكفن...ادريس خاف على بنته تطلع تخدم ف بيوت اصحاب المليارات وتنام جعانة او تنام مع بتوع رضاعة الكبير وبرضه مش حتلاقى اللى يسد جوعها

فــــــــى أربـــعـــــيــــــــن هــزيـــمـــــــة يـــونــيــــو الشهيرة بالنكسة

بلد يناضل رجاله

على فراش العاهرات

فوق منابر البارات

تحت اقدام من باعوا الوطن

واشتروا بدمه قصورا

ويخوتا..

وفستقا ..

وورقا اخضر..

واصفر ...

واهدوه ذبيحا

تحت جنازير الدبابات

ذاك وطن لا يسكنه

غير حفنة

اراجوزات

قـطـيـعــة تـقـطــع "عـــيــــــشـــــــــــة" والـلـى عـايـشــنـهــا

الكلام منشور ف عدد اكتوبر 3يونيو بعد مانشرته الصحف المصرية القويمة كلها

الحكاية مش محتاجة فلحسة ولا حاجة ستات مصر بعد مايرضعوا رجالتها مجانا لوجه الله عشان الخلوة حيروحوا يخدموا ف البيوت ف السعودية واذا حصل خلوة برضه اهه حلها معروف

السيدة عيشة الله يحفظها بعيدا عن متناول الاطفال باعتبارها ست وحاسة بالنسوان اللى زيها وعارفة قد ايه اكل العيش مر خصوصا بعد مابقت وزيرة فقررت تبعت ستات مصر كلهم بربطة المعلم يخدموا ف البيوت السعودية العامرة بمالذ وطاب ولكم ف الاميرة هند الفاسي اسوة حسنة يا اولى الالباب واهى ست زيها برضه وارست مبدأ مهم ف التعامل مع المصريين عموما ف واقعة كلاب الامير الا وهو كلب عض كلب...خدمناها جوة وخدنا اللى فيه القسمة فمابالك لما نروح لحد عندها نخدمها ونخدم اللى خلفوها واللى بيخدموها كمان

المهم الست الوزيرة قلبت وزارة القوى العاملة الى مكتب مخدماتى عمومى لصاحبته ومديرته الحاجة عيشة وكيلة كوبانية الحكومة المصرية لتوريد الخدامات وخلافه..راحت اتفقت مع اتحاد الغرف السعودية دكاكينى من غير وجود وزير سعودى اقله تبقى قعدت مع حد من مقامها...ويقال ان الوزير رفض يقعد معاها من غير محرم وعشان كدة الست خلصت الليلة ف الدخنسة لوحدها كدة ف الغرف التجارية ولا من شاف ولا من درى...امال يعنى تروح لهم لحد عندهم وترجع ايد ورا وايد قدام من غير ما تعمل حاجة كدة واما الكوبانية تسألها تقوللهم اصلى رحت لقيت الوزير ف الحمام

اللي يضايق يا اخى بقى اجرة الخدامة المصرية اللي الست راحت اتفقت عليها,800 ريال ياحاجة!!؟؟؟؟ يا نهار اسود ومهبب واكحل من قرن الخروب...دى الخدامة من دول لو حصل لها حاجة كدة ولا كدة وحبت ترجع مش حتلقى تمن التذكرة يا ستنا عيشة....سيبك م اللى بياخدوه الهنديات والفليبينيات قول دول برضه بنات اصول لهم حكومة تجيب حقهم والحكاية بالنسبة لهم مش سداح مداح كدة بالاضافة لنقطة مهمة ان معندهمش فتوى رضاعة...انما المصرية حتعمل اللى دول بيعملوه واكتر زائد الرضاعة..طب يا حاجة اختشى وحطى ف عينك حصوة ملح وضيفى تمن اللبن

البروتوكول اللى وقعته الحاجة عيشة زى البلوة فوق نافوخنا قال بيشترط ان الخدامة تبقى مؤهل عالى!!! طب اشمعنى ده بقى اللى عايزينه عالى ما كله واطى واطى واطى اهه جت ع المؤهل ويبقى عالى...يا زين ماخلفتى وربيتى يا زينب عالمة وخدامة

شايفااااااااااك ياللى بتقرا ومشمئنط ورافع حاجب ومنزل اخوه وبتقول لى من تحت الضرس باستنكار بلوتوثى جهنمى بالغ قصدك ايه يا داهية هى الخدمة ف البيوت عيب؟؟؟ اقوم اقول له انا باستحمار وحدوى تفاعلي ضعيف ان ده مش قصدى...الخدمة ف البيوت وكنس الشوارع وتسليك البلاعات كمان كله شغل واحسن م العوالة ومد الايد او مد حاجات تانية كمان انما العيب هو السخرة وتجارة العبيد وبيع البنى ادمين اللى بيحصل دلوقت والاسم اننا "بنخلق فرصة عمل" "والحقيقة اننا "بنخنق اخر امل

لا واللي يضحك بقى ان عيشة عملتها وجريت...راحت تصيف ف مؤتمر ف جينيف "اصلها طراوة انما السعودية حر وخنقة بعيد عنك و"الخدمة فيها مش قد كدة

المزة العراقية والفيران الاربعة

قامت الأديبة العراقية الأردنية سارة طالب السهيل بزيارة إلى الأردن مؤخرا تلبية لدعوة للمشاركة في ندوة "حب الوطن" والتي نظمتها مجموعة من سيدات الأردن المثقفات ونخبة كبيرة من السيدات العراقيات المهتمات بمتابعة المبدعين العراقيين والتواصل معهم.ناقشت الندوة - وفقا لجريدة "الرأي العام" الكويتية - قيم الانتماء وسبل غرسه في الأجيال وصولا إلى المعنى السامي لحب الوطن

مش حارغى كتير حاسيبكم لضميركم..والنبى حد يعرف الولية دى..حد يعرف ايه حكايتها...مزة تشوف صورها من وقت للتانى على صفحات المجلات و الجرايد وتحديدا ف ابواب الاجتماعيات وعادة اخبارها بتبقى اقرب للاعلانات...وتلاقى الست مصحوبة بالقاب مقعرة مفخمة مدججة بالسلاح الامريكانى من نوعية الاديبة الشاعرة الكاتبة المثقفة العاقلة الكاملة الواعية.....الخ ومحدش سمع عنها حس الا مع بركات الاحتلال الامريكانى المعظم للعراق...زى ما يكون شئ لزوم الشئ...افتكر ان الجرايد المهذبة المصرية تبعنا رقصت و غنت وطبلت و زمرت عشان الست الاديبة المزة كتبت قصة للاطفال اسمها "مزة اوباين سلمى و الفيران الاربعة" معرفش يا خويا هما اربعة ليه ولما قريت طراطيش كلام م القصة حسيت انها قصة رعب مش قصة اطفال

لما تشوف الاديبة المناضلة مع نسوان المجتمع الراقى اللي بتقابلهم ف مختلف الاقطار العربية حتلاقى قدامك مزة سينمائية شعرها مسبسب ومكياجها ولا العرايس وهدوم اخر شياكة وارد فرنسا عدل وتقريبا تشم ريحة برفانها فايحة من ورق المجلة اللي ناشرة خبرها وبرضه المفروض انها الاديبة المناضلة داعية الاخاء و المحبة و السلام بين العراق وبين بقية الدول العربية اللى لسة ماصابهاش دور الاحتلال لحد دلوقت..لا وهاتك يا كلام كبييييييييير يصعب على امثالى فهمه من نوعية كلنا اخوة كرد عرب كلدان شيعة سنة مسيحى مسلم وده كلام زى الفل بصراحة وبديهى لو اتقال ف ظروف احسن من كدة ولو مفيش احتلال مقوم كل دول على بعض..دى ناقص تقوللك كلنا اخوان عرب وامريكان...طول عمرنا ياخويا نعرف ان في علاقة عكسية بين الشياكة والفخفخة والابهة وبين النضال والوطنية والدعوة للسلام خصوصا ف ظل الاحتلال الا مع الولية دى ويظهر ان لكل قاعدة استثناء يؤكد المعنى ويثبته بغرا

نفسي اعرف الولية دى وراها ايه ولا مين اللى زاققها وزاققها ليه وعلى مين

واحد حيقوللى دى غيرة نسوان وبصى لشكلك و شكلها ايش جاب الوز العراقى المفتخر لحداية عندها انفلونزا طيور مزمنة..حاقول له ماشي يابا تشكر على كل حال بس اموت و اعرف الولية دى عايزة ايه...وحياة ابوكو اللي يعرف عنها حاجة يبلغ..اقصد يبعت يقول لى و ينوبه فى ثواب وحابعت له نسخة من عملها الملحمى الخالد "وزة والفيران الاربعة"